Wanne wafikishwa mahakamani kwa madai ya kukutwa na noti bandia

Watu wanne wamefikishwa katika Mahakama ya Hakimu Mkazi Mwanza wakikabiliwa na jumla ya mashtaka matano yanayohusiana na uhalifu wa kiuchumi, yakiwemo kosa la kuongoza genge la uhalifu na kukutwa na noti bandia

Washtakiwa hao ni Richard Jackson Sinkala (38) mkazi wa Buhongwa, Hassan Ibrahim (47) mkazi wa Igoma, Emmanuel Simon Ngama (32) mkazi wa Nyahong'homango, na Gerald Melijory Majaliwa (30) mkazi wa Buhongwa, Wamefikishwa mahakamani mbele ya Hakimu Mkazi Erick Malrley, na kusomewa mashtaka yao na Wakili wa Serikali Sileo Mazullah

Kwa mujibu wa hati ya mashtaka, shtaka la kwanza linawahusisha wote wanne kwa kuongoza genge la uhalifu, kinyume na Kifungu cha 4(1), 57(1), na 61(2) vya Sheria ya Uhujumu Uchumi, Sura ya 200 (Marejeo ya 2023), shtaka la pili ni kukutwa na noti zilizoghushiwa, kinyume na Kifungu cha 348 cha Kanuni ya Adhabu, Sura ya 16 (Marejeo ya 2023)

Shtaka la tatu linamhusu mshtakiwa wa kwanza peke yake, ambaye anadaiwa kufoji noti, kinyume na Kifungu cha 338 cha Kanuni hiyo hiyo, Shtka la nne ni utakatishaji wa fedha dhidi ya mshtakiwa wa kwanza, kinyume na Kifungu cha 12(c) na 13(1)(a) cha Sheria ya Uhujumu Uchumi, Sura ya 423 (Marejeo ya 2023), vikisomwa pamoja na Kifungu cha 57(1) na 61(2) vya Sura ya 200.

Shtaka la tano linawahusu washtakiwa wote wanne kwa tuhuma za utakatishaji wa fedha, wakidaiwa kukiuka masharti ya kifungu hicho hicho cha sheria pamoja na Aya ya 22 ya Jedwali la Kwanza.

Mashtaka hayo yanadaiwa kutendeka kati ya Januari 2023 hadi Julai 17, 2025, katika maeneo mbalimbali ya Jiji la Mwanza

Baada ya kusomewa mashtaka yao, Hakimu Erick Malrley akawataka washtakiwa hao kutojibu chochote kwa kuwa Mahakama hiyo haina mamlaka ya kisheria kusikiliza kesi hiyo mpaka kibali kitakapowasilishwa. Hivyo, aliagiza warejeshwe Gereza la Butimba hadi Agosti 13, 2025, kesi itakapotajwa tena.