Rais Tshisekedi hatahudhuria kikao cha UN kufuatia vikwazo vya usafiri vinavyohusiana na Ebola

Taarifa hiyo imetangazwa rasmi Jumapili, Septemba 20, kupitia taarifa ya serikali ya Jamhuri ya Kidemokrasia ya Kongo (DRC) bila kutoa maelezo yoyote: Rais wa nchi hiyo, Félix Tshisekedi, hatakuwepo kwenye Mkutano Mkuu wa Umoja wa Mataifa.

Félix Tshisekedi atawakilishwa New York na ujumbe unaoongozwa na Waziri Mkuu Judith Suminwa.

Ingawa wakuu wengi wa nchi na serikali wanatarajiwa wiki hii katika Mkutano Mkuu wa Umoja wa Mataifa huko New York, Rais wa Kongo Félix Tshisekedi atakuwa miongoni mwa viongozi mashuhuri ambao hawatahudhuria kikao hiki cha 81. DRC itawakilishwa na Waziri Mkuu Judith Suminwa na Waziri wa Mambo ya Nje Thérèse Wagner.

Taarifa hiyo ilithibitishwa rasmi na taarifa ya serikali iliyotolewa siku ya Jumapili, Septemba 20, saa chache kabla ya Waziri Mkuu kuondoka nchini akiwa na ujumbe mdogo kwenye ndege ya Air Congo kupitia Ulaya.

Ingawa hakuna maelezo rasmi yaliyotolewa kuhusu kutokuwepo kwa Rais, vyanzo vilivyowasiliana na RFI vinataja hali ya kiafya nchini humo. Tangu kutangazwa kwa mlipuko wa Ebola katika mikoa kadhaa ya kaskazini mashariki mwa Jamhuri ya Kidemokrasia ya Kongo, Marekani imeweka vikwazo vya usafiri kwa watu wote wanaowasili kutoka DRC, Uganda, na Sudan Kusini. Vizuizi hivi vinapiga marufuku raia kutoka nchi hizo kuingia Marekani bila kwanza kupitia kipindi cha karantini cha siku 21 katika nchi ya tatu.

Ingawa bila shaka kuna misamaha kwa wakuu wa nchi na serikali — ambayo inamruhusu Waziri Mkuu kusafiri kwa ndege kwenda New York siku ya Jumapili —, msafara wa rais ungesemekana kuwa mkubwa sana kiasi cha kutoweza kunufaika na misamaha hiyo. Hata kama idadi ya maafisa wanaohusika na usalama wa rais ingepunguzwa kwa kiwango cha chini kabisa, hiyo bado isingetosha. Hii ndiyo sababu pia — miongoni mwa sababu nyingine — iliyomfanya Félix Tshisekedi kuahirisha safari yake ya awali ya kwenda Marekani, mwezi Julai mwaka huu.